نبذه عن البدر وحياته"ديوان أنا بدوي"

لو ما تحب العين


لو ما تحب العين ما ضمت دموع
يا عاذلي بالله جز عن عتبها
اربع ليالي كلها سهد وولوع
استغفر الله ما تلاقي هدبها
تكاثرت من همها ساعة اهجوع
الله حسيب اللي غدى هو سببها
الجادل اللي لفتته ورد وشموع
يا حيف قلبي اللي احترق في لهبها
يمد لي حبلٍ من الود مقطوع
غير السلام وبسمته ما عقبها
يا قلب .. يا قلب الخطا دونك ضلوع
يا شين قل لي راحتي هو نهبها

---------

لا تقول

لا تقول ودعتني داري
بالحيل مالي عليك عتاب
مريت في موعدك ساري
وقفت لين النجم ماغاب
الليل تحت الشجر عاري
والفجر غطي السما بثياب
والريح في كفوفها الذاري
تدفن ارسوم الوعد بتراب
مريت ماللوله طاري
ووقفت ماللندم اسباب
مدري تعودت مشواري
أو خان بي قلبي الكذاب

---------

لاتعلمني


ليه أحـــس إني وأنا اشوفــك حزين
وقــلبــي الـلـيـلــه بــهـــمــي ممتـلــي
كانهـــا الفــرقى طلبـــتك حـــاجتين
لا تـــعــلــــمنــي ولا تـــكـــذب عـلــيّ
خـلنــي مــا بـــين شكــي والــيقيــن
الــسـكــوت رضـــــاي عنــك وزعلــي
بــاكــر الـلــي خـــافــيٍ لازم يبيــن
والــوعــــد بـلقــى مكـــانك بــه خلــي
وانتظــــــر لــي ليلــة او لـــيلتيـــن
لين مـا يـقـفـــي الـسحــاب وينجلـــي
ولا طويت اليـــاس بـذرف دمعتين
للـهــوى الــغــــالــي وبـا وادع هـلـــي
صاحبي بمـــــوت من كثر الحنيـن
خــلـنــي بــخـــتـــار لــحظـــة مقتلـــي

---------

لا تعقد الحبل

شمالٍ هبت ورذرذ مطر ما به ذرى وخطار
تبي تدفا في تالي الليل والخشبان مبتله
ألا ياضيف وش جابك عسى ما جيتني دوار
مضيع والنياق اللي تدور عنها مندله
سرحت افـ خاطري ذودك ذلول وفاطرٍ وحوار
تبي تاكل ربيع المجرهده دقه وجله
ألا يا شين لو ذودك رعايا تحتميها امهار
أظنك ما تراعي للخلايق سلمٍ أو مله
ترى ضرب الفيافي ما يجي للخايف المحتار
أمانه لاتعقد الحبل ثمٍ تعجز تحله
سرت عنك المطايا .. والمطايا عينها للدار
تبي تشوف البلاد وصابها خالي الخلا بخله
ضوى همك وشبيت اف ضلوعي نار للخطار
فريت المجذوي .. قلبي دفنته قرص في المله
تعش ولا بدى نور الفجر خل الهقاوي يسار
وعوّد وان سمعت الشور لا تبعد عن الحله

---------

لحظة وداع

عيني عن النوم جزاعه
وكثر الهواجيس قزّني
وأشبح متى عقرب الساعة
يطوي ظلام الكدر عني
قلبي زوال الرجا راعه
ما ارتاح يوم ابعدوا مني
وقفت انا لحظة وداعه
أبكي .. وأنا ضاحك سني
مسكين من صاحبه باعه
وعيّن لياليه يشرني





ليلي


ليلي مثل ليلك ... او همومنا غير
قلي صباحك مشرقه مع صباحي
إنت السما عندك... نجومه ... نواوير
ومن الفرح عجعج سناها ... وفاحي
وانا نجومي ... في الغداري مسامير
على السما ... دقت بكل النواحي
جاك الظلام .. وجـاك ربع ومسايـير
وجاني الظلام وكل ما احب راحي
علمي بنور الشمس ... وقت المعاذير
قال الوداع وقلت.. دربك سماحي
كان الالم.. غيثٍ فدمعي محـادير
وكان الندم سيلٍ فخدي .. بطاحي
تقول خل الهم واكفخ كما الطير
عطني سما ياخوك والوي جناحي

غريق الدمع

اللـي طعنّي بين الاضـلاع وأدمى
هذاك نــدٍ لي ونعمـين فارس
ومن ينطح الوقت الردي قلبه أعمى
كم عامـرٍ خـلاه بالقاع دارس
يـابنت مـالي قلب بـالحب يرمى
كفي سهـام الفاتـرات النواعس
المـا عيـوني أظهـريني مـن المـا
وأنـا غريـق الدمع والريق يابس
ظميـان من مثلي من النـاس يظما!!
وأنـا علـى أحلى الينابيع حارس
والله يالـولا فيّـة عيـون سـلمى
ماشوف كل الناس ضاحك وعابس
مـن طـاب لي بالنـور ماني بظلما
ومن جـادلي بالغيث مـاني بحابس





الغراب اللي نعق

ليت ها العين ضاقت بالحدق
قبل جدرانها بوجهك تضيق
والله اني صحيت من الأرق
راحلٍ لا مكان ولا طريق
ما سمعت الغراب اللي نعق
وين مثلي .. على مثله يفيق
منزلي في الطويل الي شهق
ومنزله قاعة الوادي السحيق
قالو الحاقد بدمك شرق
كنه الشوك في ثوبي علق
يوذي الشوك ولا يقطع طريق
كثر ما الريح تعبث بالورق
وتوقد أغصانه الصفراء حريق
وكثر ما شوه العج الشفق
وقص من جيده عقود العقيق
وكثر ما صابني وأخطا التفق
لين ما أصحبت من خوفي طليق
وكثر ما نز في كفوفي العرق
من سلام على غير الصديق
اتركيني على باقي عبق
غيمة العطر من عمري العتيق



اللوعة

ياللي نسيت الزمن وقلوبنا تعده
كم ليلةٍ غبت والهاجوس يلعب بي
لا انت مع القلب يالغالي ولا ضده
كله سوى راحتي والا تعب قلبي
يسيل قلبي على الخدين .. وارده
خبرت قلبٍ من اللوعات ينحبي
وان قلت لا بد يبرد زادت الشده
شقيت انا منك والشكوى على ربي
يا من يغيب القمر لا من ظهر خده
الزين زينك وانا كثر الوله ذنبي
من عانق السيف لازم يجرحه خده
ومن يعشق الجمر فيه النار تشتبي



قمرا

انتي مثل قمراً على صفحة الما
له صورة عندي وهي في السّما فوق
اتصافحك عيني وأنا كفي أعمى
مَالي جدى إلا مصافح الموق للموق
ياما شربتك شوف من خوف لا أظما
وياما الوله للوصل يّبس بي عروق
وياليتني بدلت نورك بظلما
واخترت لي غيرك من الناس مخلوق
اقول أحبك يا عذابي أو أكما
لا حاصلٍ قربٍ ولا نافعٍ شوق

القاع والمسافة

انا احبك مابها زيف وخداع
رغم الذي نخفيه .. واللي نخافه
أودعك .. ليت الألم لحظة اوداع
إلى مضت .. ننسى الألم والحسافه
وأفارقك.. لوالسفر .. يم وشراع
وبعد الفراق .. اللي نوده نعافه
لا صار مافي البعد راحه لملتاع
بالله وش نفع التعب والكلافه
من الجفا والصد .. يكفيني اذراع
لا جف نهر الحبماتت اضفافه
املي يدك رمل وترى هذي القاع
ومدي النظر .. تدرين وش هي المسافه


قلبي سجد لك

قلبي سجد لك قبل لا يسجد حجاجي
على الثرى اللي تسامى بالنبي أحمد
قصدت مسجد نبيك ..نادم... لاجي
عن كل جرح.. وحزن...وهاجس..أسود
قدست نورك... وغيره مظلم.. وداجي
واخلصت في عبادتك.. ياخالقي فـ اشهد
اشعلت شمسي.. وغيضك يطفي سراجي
وأنت الوحيد الذي على الضرر تحمد
ان تبت عن مدخلي... يا طيب مخراجي
أموت وولد... وموت برحمتك... وولد
لوخضت بحر و أنا في عزتك ناجي
ولو كنت أنا البحر... مالي عزتك بنفد
خمسين حولٍ مريض الطرف وعلاجي
في ركعتين تداوي قلبي الأرمد
نزت عن خاطري خزي وديباجي
شوك... وكستني المحبة ثوب من عسجد
يا هل المدينة سلام كثر ما هاجي
نسيم صبح وناح الراعبي وغرد
على الذي له في عالي الفلك معراجي
نبينا اللي اصطفاه الخالق الأوحد
لاجيب طيبه تهدم برجي العاجي
ظهرت من مثل قبري عاري أجرد
وقلبي سجد له قبل لا يسجد حجاجي
على الثرى اللي تسامى بالنبي أحمد


ليل التجافي

آه ... من ليل التجافي ... ماطوله
ليلة العاشق ... ثوانيها ليال
من يقول الشمس باكر مقبله
كل شمسٍ مالها ... وجهك ظلال
بسالك باللي خذى منك الوله
وحطه اف صدري ... واعطاك الجمال
حاكني ... لجل الليالي ...الآوله
آه انا بموت من ذل ... السؤال
هو صحيح انك حبيبي اللي دله
واستوى ... عندك فراقي ... والوصال
كل جرحٍ غير ... جرحك بقبله
وكل ظلم ٍ ...غير ظلمك لي ... عدال


الليل والوعد

الله عليم .. إني مليك وأنا حر
لأجل الهوى .. رضيت أنا بظلم سيدي
من عادتي .. مالي جلاده على الضر
واليوم أنا لرضاه باقطع وريدي
لأجله غديت أستعذب العلقم المر
وأضمد الجرح القديم بجديدي
اللي فــ .. وعده لو طال الليل يقصر
وكل لحظة تمضي .. فعمري تزيدي
وسحابه للدمع لاغاب تمطر
تسقي على شفاهي خزامي قصيدي


كثرت عذاريبي

يا صاحبي كيف أنا كثرت عذاريبي
أو هو الزمان الذي كثرت عذاريبه
وكان الليالي مثل عرفي وتجريبي
جرحٍ لفت به وجرحٍ بد تاتي به
انا أحمد الله على سدة مواجيبي
لي راس مالٍ رصدته في مواجيبه
مادام راسي عزيزٍ ذي مطاليبي
ما تعذرون الذي عزه مطاليبه
ما اخترت أنا الطيب انا مختارني طيبي
من علم الحر يشهر في مراقيبه
ولا تحسب ان الثني والمدح يطغى بي
حيث أن كثر الثنا والمدح أنا أحرى به
عن نية الجود صعب اليوم تجنيبي
من قيل ذا النجم جدك غصب يسري به


النسيان

تذكر النسيان ... لاعاد تنساه
ياقلب ... وانسي القلب لعل يشفا
يدرى الحبيب ... انه حبيبٍ وابجفاه
ماهو خراب الكون ... لاقفيت واقفا
كان الخطا منى ... فقلبي خطاياه
هو علمه ... وشلون ... يهجر ويجفا
تعب المسافر ... وابعد الموج مرساه
صار المدى له يم ... والشمس مرفا
ومل الهوى نوحه ... وبوحه ... ونجواه
ماعاد لى صبر على الجراح ... تكفا
الى متى ...صدري بيحترق حناياه
كنك على صالي ...عظامي بتدفا
والى متى ... جفنى بيسقيك من ماه
كن الليالي لاصفا الدمع تصفا
تذكر النسيان .... ياقلب وانساه
وانسي ... الجروح اللي مع الوقت تشفا

هيهات


لادمعة في العين تكفي ولا آه
لا من نوى لك صاحبك بالقطيعه
الله على بعض المحبـين ما اشقاه
يرجي زهــر روضٍ تولى ربيعه
ولا مـن خذا له ساعة قال ابساه
بانسى هوى اللي بـاعني قبل ابيعه
وده يعسر القلب عن غي مشهاه
هيهات ياقلب الخطا لو تطـيعه
الله يجازي الحب مااكبر خـطاياه
شره على اصحاب النفوس الرفيعه
اهـل الوفا واهل الشيم من سواياه
ضاقت بهم دنيا فججها وسيعه
والا الخبيث بمنسم الرجل ناطاه
يوم الغـدر والخبث عنده طبيعه
يالله عسى لي خيرة عقب فرقاه
لوكان فرقا الخل مثل الفجـيعه


لاتجرحيني

لا تجرحيني .. جرحك العام ما طاب
داوي بحنانك ما مضى .. واجرحيني
ياللي حنانك نظرة بين الأهداب
ردي علي بعض العزا .. ناظريني
خافي على قلبٍ يحبك إلى ذاب
ذاب الهوى في خفقته .. والحنيني
لولاك ما زار القمر ليل الأحباب
ولا لوحت شمس المحبه جبيني
ولولاك .. ما يلفي على الدّار غياب
ولا تبكي اللي فارق الدار عيني
في غيبتك كل الملا عندي اغراب
ما أحدٍ أبي قربه .. ولا أحدٍ يبيني
لا ياغلا كل القرابه والأصحاب
ضاع العدل في الناس لو تظلميني


مالي على الحب سلطان

بمناسبة شفاء صاحب السمو الملكي الأمير سلطان بن عبد العزيز .. وعودته من رحلته العلاجية ..

يا سيدي ما لي على الحب سلطان
انت الذي تامره بأمرك وتنهاه
كلٍ له اصحابٍ .. وربع ٍ .. وخلان
ناسٍ تبي نعده وناسٍ تمناه
إلا أنت كل الخلق في حبك انسان
قلبه معك دايم صباحه وممساه
ياللي وسع صدرك لنا دار وأوطان
ياللي الصخى والطيب فعلك تعداه
أنت البخيل ابمنتك وقت الاحسان
وانت الذي لطفه يسابق عطاياه
ما كل من فارق غدى مثل سلطان
كلٍ يبي شوفه .. وكلٍ ترجاه
لو المرض جيشٍ نطحناه بسنان
ولو الكدر بحرٍ شربناه لرضاه
أنا أحمد اللي بدّل الجهل بإيمان
اللي حفظ عمي وصانه وشافاه


وعود وأعذار

عطني فـهواك الصبر لاصرت قاسي
تبدي حنان وداخل القلب جبّار
لا صار قلبك خالي الحس ناسي
وتلعب على المشتاق بوعود واعذار
ولا صار فيك من الأمل كثر ياسي
وعندك يقين وتارك القلب محتار
لا من نسيت اولي نويت التناسي
اترك وراك لباكي العين تذكار
اشرب معاه الوهم لا جف كاسي
و لا ما حصل شوفك أضمك بالأفكار
يا حارمٍ عيني لذيذ النعاسي
ومعذبٍ روحي بجنّتك والنّار



نسيم الليل

هب النسيم بريح من مفرقه لاح
عطر.. وسنى من غزة الليل بادي
ما عاتبه موضى جبينه ولا شاح
أعطاه خده .. وانتشى بالبرادي
لا يا نسيم الليل قلب الخطا باح
والعين ملت جفنها من سهادى
يا ليتني مثلك خلي ومرتاح
ما أحد نشد عن غايتي .. عن مرادي
ولا طاب لي غصن من الغى مياح
أروي غليل القلب لا صار صادي
لا شك أنا بالحب كتبت لي جراح
شربي حزين الدمع .. والصبر زادي
لا جيت أبا أدله عن زماني الذي راح
قالت ليالي الشوق00وين أنت غادي



نبض الحب

كل حبٍ .. تغير وانمحى
مـن حـنـايـاك يالـقــلـب الـقــديـم
كود نبض على وضحى صحى
أول العمر يوم اني فطيم
لامني الشيب .. وابعدني السحى
لا ارتمى فوق هالصدر الرحيم
أعشق الوضح لاجلك والضحى
وضوح برق الوسامى في العتيم
اقبل الصبح والليل انتحى
ابشري بالفرج والله كريم

المحبه أرض

المحبة أرض والفرقا أراضي
والزمن كله ترى لاغبت ماضي
والله إني ما أشوف إلا عيونك
إن رحلت اليوم أو طوّل مراضي
قالوا العـذّال والعـذّال مرضى
وش بلا حالك من الاشواق قاضي
قلت يهجرني حبيبي لين يرضى
علّموا الظالم ترى المظلوم راضي
جرّحوني في هواك وقلت أبشكي
ماهو من جرحي ولكن لـ إعتراضي
وش علي لو قطّعوا لاجلك عروقي
من رضى بالحب .. يرضيه التغاضي


وضحى

وضحى لها من طامن الغيم طله
تسقي الكبود بلطفها مثل الازهار
وضحى خذت من حارق القيظ كله
مدري سحاب كفوفها مدري انهار
وضـحـى لها زين المخـاليق كـلـّـه
ايـضــا.. وفـوق الزيـن حـشـمـه ومـقـدا ر
وضحى الحمود لسيف الامجاد سله
حبلت بها صرخه وتعزى لبتار
أحــبـهـا ما يـكــفي ا لوصـف كـلـه
تبقى الحـروف حـروف وأشـعاري أشـعـار

نور الصبايا

عـذب الشـفايا .. معـسل الـريـق مـاذيـق
نجـل العــيـون .. معـذب القـلب بالشوق
نور الصبايا .. شـوف رسـمه تـشافـيق
متعـب .. لعـوب .. وظايـم الضـد بـرفوق
يبهج شـبابه عـثـرته للعشاشـيـق
يضحك .. وأنا قلـبي من الصـد محروق
لا .. يا ذهـب .. ومـخـبّـىٍ بـالصـناديـق
لا له ثـمن يشـرى .. ولا هـوب مسـروق
مثل الثريا نـوف .. مالك تلاحـيق
ومضـوي شعاعـك في سما كل مخلوق
ملكـتـنـي .. وأدمى هـواك الـمعـالـيـق
وأنا .. مليـك بجرحه قـول معـتـوق

عاشقة الدموع ...
لااعلم ماذا سيكتب قلمي لك واي حرف سيجاري حرفكِ..
رأيت الابداع بين سطوركِ..اسعدني ما كتبتِ
لك مني كل الحب.

إذا كان للأبداع قلم
فأنتي مكانه
وإذا كان للتميز مجال
أنتي مجاله
وللكامل عنوان فالبدر عوانه
الف ترليون شكر ع الطرح الراقي والمتميز
دمتي بنظره تألقيه دائمه
تقبلي مروري

رهين الشوق

الله لايحرمني من هالاطلاله وهالتشجيع اللامتناهي

دمت بشموخ

صمت المشاعر

ان كان للجما ل عنوان فأنت أهلا له

مرورك زادني ألقا

لاحرمني الله تلك الاطلاله

ودي