اغـاريد !

سمآي عرّت شموسك .. وأغرت المغرب
لين ارتجـل ... وأمتلى ليــلي انـاشـيد

أرم الخطاوي بعد شال الجفى .. وأقرب
ارضي : على بالها .. جِرّة مواعيد !

بالجمرتين الحُمر شب الحكي .. وأسهب
لو وجهك من الشتاء .. يرجف ورعديد

وابفهق الدمّ عن عظمي .. واقول : أرحب
مركاك خفّـاق ..... وانفــاسي مواقيـد

مشتاق أعد الجروح الماضيه .. وأعتِب
لين انشغل فيك .. وأسهى ، وأرجع اعيد

واشربك لين ارتوي منك الضمى .. وأجدب
وادعيك قطــره ... وتثمر بي عنــاقيد !

حــاول تغافل .. وصدقني وانا اكذب !
لا قلت : ماودي ان جروحك .. تزيد !!!

صحيح صوت الجروح ان غردّت .. تتعب
لكّن مع ذا .. وذا .. تبقى أغــاااريد !!

ازهـابها .. لجل تزهــابي .. وانا اكتب
لو كان وجه الورق .. كلـّه تجاعيـد !!

بالله صوت الحزن فالناي .. مايطرب ؟
مع انه يكحّل السهران .... تسهيد !

هارب .. ويدري بك انك ناويٍ تهرب
واخذ يدك .. واستـدار ... وودّع البيـد

من اول الصبح هـارب لآخر المغرب
ومواعدٍ شمس .. نسّاية مواعيد !!

للفآضل / خآلد الدعجآني

صح اختيارك ..
وسلمت هالأنامل ي رب