‏ ‏.. رعشة خفوقي ..

أدورني ولا ألقى أثر يكشف مكاني وين !
................ أدورني وأثاريني [ وطن مجفي من أحبابه ]

ماغير الهم يرسمني - حكايا ترفض التلوين !
................ سوى بـ لون السواد اللي جروحه سبة أتعابه ..!

ثلاث سنين والفرحه تعاندني | ثلاث سنين ،
................ وأنا من يوم مافارق عيوني أبكي غيابه ..!

ثلاث سنين أصوت له ويخنقني شهر تشرين !
................ يزيد الجرح في صدري / ويرميني على بابه .!

ثلاث سنين أنزف له على سكة جروح البين ،.
................ ولا يحضني إلا الهم | وشارع فاقد أصحابه !

أجمع دمعتي .. حزني .. طعون ماأعرف منين !
................ بقايا فرحتي .. ضحكي .. وأطير للسماء أسرابه !

تعبت أتنفسه ضيقه / ويكبر داخلي تخمين ،
................ يبي يرجع يلملمني بعد ماضعت بـ اسبابه ؟!!

وأنا في غيهبة حزني خذتني صوره لـ( طفلين )
................ ملامحهم تشابهنا وحتى الضحك متشابه .!

زوايا بيتنا .. جدراننا .. همساتنا الأثنين ،
................ بقايا نظرته .. تسريحته .. شماعة ثيابه !

أنا أذكرها محبتنا .. شقاوتنا .. بيوت الطين !
................ وصوت لاسكن فكره سرحت أشكيه لألعابه ..!

يجيني ( ليش زعلانه؟ ) ويحضن وجهي بـ كفين ،
................ وأتمتم حيل " ماأحبك " ويضحك حيل ( كذابه ) !

رسمته حلم فرحني | سكني وإستحل العين ،
................ تعمق داخل عروقي عشق صادق محد صابه .!

زرعني في تفاصيله وغاب بـ ضحكة الواشين !
................ تعلم منهم يقسى / حصدني شوق يغتابه ..!

رحل | وإستاحشت روحي وقلبي إنشطر نصفين !
................ تخبى نصف في كمه / وذاك بـ رف دولابه ..!

كبيييره اني آخونه | بسيطه نكون له وافين ،
................ أنا وإحساسي وكلمه تخبت داخل كتابه !

أحس بـ داخلي شعب تعب من كثرة التوطين ..!
................ تجرد مني / ومني خذا من صدري ترابه !!

تعبت أستنزفه فيني [ أنين ] أشتعل بي لين :
................ طفى وهجه من أعماقي وذابت لأجلي أهدابه !!

أغني له [ أنا بعدك صحاري ملها التكوين ]
................ حزينه - تعزف ضلوعي لحون بـ نغمة عتابه ..!

" فقدته " وإنكسر عشق تبلور فـ الخفايا زين ،
................ وضاعت معه أحلامي / وضعت بـ زحمة أطيابه .!!

رزان العتيبي